Казанда ашыгыч ярдәм машинасы катнашында юл һәлакәте булган, хатын-кыз зыян күргән
Казанда, Чистай – Декабристлар – Вахитов урамнары һәм Ибраһимов проспекты киселешендә ашыгыч ярдәм машинасы катнашында юл-транспорт һәлакәте булган. Шаһит авария нәтиҗәләрен телефон камерасына төшергән. Якынча мәгълүматларга караганда, ашыгыч ярдәм машинасы белән җиңел машина бәрелешкән.
М.Н.Садыйков исемендәге 7нче шәһәр клиник хастаханәсенең матбугат хезмәте «Татар-информ»га хәбәр иткәнчә, юл һәлакәтендә зыян күргән хатын-кызны медицина учреждениесенә китергәннәр.
«Клиникада диагностика чаралары үткәрелде, пациентны төрле белгечләр карады. Барлык кирәкле медицина ярдәме күрсәтелгәннән соң, хатын-кыз амбулатор күзәтү астында өенә кайтарып җибәрелде», – дип сөйләделәр шәһәр хастаханәсенең матбугат хезмәтендә.
Юл-транспорт һәлакәтенең шартлары, шулай ук башка зыян күрүчеләр турындагы мәгълүмат ачыклана.