Казанда Аккош күлендә узган Сабан туен 30 меңнән артык кеше караган
Сабан туеның абсолют батыры исеменә беренче ярышлар сәгать 10 ук булды, ә аннан соң театральләштерелгән тамаша тәкъдим ителде.
(Казан, 24 июнь, “Татар-информ”). Аккош күле территориясендәге Сабантуйны 30 меңнән артык казанлы һәм башкала кунаклары караган. Бу хакта Киров һәм Мәскәү районнарының массакүләм мәгълүмат чаралары белән эшләү бүлеге хәбәр итә.
Бәйрәмдә катнашучылар күңелләренә хуш килгән тематик мәйданчыкларда булды. Сабантуй батыры исеменә беренче ярышлар сәгать 10 да ук булды, ә аннан соң күл турындагы риваятькә нигезләнеп эшләнгән театраль тамаша тәкъдим ителде. Аның буенча, күл кайчандыр көчле агымлы елганың зур бер өлеше булган.
Футбол буенча дөнья чемпионатына килгән шәһәр кунаклары да милли бәйрәмне карады. Колумбиядән килгән төркем зур тырышлык белән күп кенә ярышларда катнашты.
Төп концерт мәйданында Гүзәл Уразова, Равил Харисов, Айгөл Бариева, Марсель Вәгыйзов, Иркә һәм башка җырчылар чыгыш ясады.
Бәйрәм абсолют Батырны бүләкләү белән тәмамланды, ул - Яшел Үзәннән Фирдүс Зәйнуллин булды. Җиңүчегә Сабантуйның төп бүләге – тәкә тапшырдылар.