Дин 8 ноябрь 2021 14:38

Казанда 400дән артык мохтаҗ гаиләгә гошер сәдакасы бирелде

Татарстанда барлыгы 577,33 тонна гошер сәдакасы җыелды.

Скопировать ссылку

(Казан, 8 ноябрь, «Татар-информ»). ТР мөселманнары Диния нәзарәтенең «Зәкят» хәйрия фонды Казанның 400дән артык аз керемле гаиләсен азык-төлек белән тәэмин итте.

Татарстан Республикасы Диния нәзарәте хәбәр итүенчә, Татарстанда барлыгы 577,33 тонна гошер сәдакасы җыелды. Мөхтәсибәтләр арасында беренче өчлекне Балык Бистәсе (75 т), Балтач (43,5 т) һәм Чирмешән (40 т) районнары алып тора. Шулай ук Питрәч районы (30 т), Чүпрәле районы (27 т), Саба районы (26 т), Биектау, Әтнә, Кукмара районнары (25әр тонна), Мамадыш районы (20 т) зур активлык күрсәтте.

Кампания кысаларында җыелган азык-төлек хәйрия оешмаларына (Татарстан Республикасы мөселманнары Диния нәзарәтенең «Зәкят» хәйрия фонды һәм «Ярдәм» милли ислам хәйрия фондының тернәкләндерү үзәге), социаль учреждениеләргә (районнардагы картлар йортлары, балалар йортлары), мөселман уку йортларына (мәдрәсәләр, мәктәпләр һәм балалар бакчалары, Коръән хафизлар әзерләү үзәге һ.б.), шулай ук турыдан-туры мохтаҗ гаиләләргә җибәрелде.

Гошер җыю кампаниясе Татарстанда барлык мөхтәсибәтләрдә үзәкләштерелгән рәвештә 2017 елдан бирле үткәрелә.

Гошер ул – сәдаканың махсус төре, ул мөселман кешесенең үстергән уңышын җыеп алганнан соң, аның уннан берен мохтаҗларга бирүдән гыйбарәт.

#гошер сәдакасы #гошер

Сәхифәләр

Казанда 400дән артык мохтаҗ гаиләгә гошер сәдакасы бирелде