Казанда 2-5 гыйнвар көннәрендә кунакханәләр 80 процентка тулыр дип фаразлана
«Татарстан, Казан халкы һәм барлык туристлар коронавирустан вакцинация турында QR код кирәген белә. Туристик агентлыклар да бу хакта хәбәрдар итә», — диде Ләйлә Фазлыева.
(Казан, 21 декабрь, «Татар-информ», Гөлнар Гарифуллина). Казанда Яңа ел каникулларында кунакханәләргә туристлар агымы 2-5 гыйнварда булыр дип фаразлана. ТР Премьер-министры урынбасары Ләйлә Фазлыева бу хакта Хөкүмәт йортында брифингта хәбәр итте.
«Татарстан, Казан халкы һәм барлык туристлар коронавирустан вакцинация турында QR код кирәген белә. Туристик агентлыклар да бу хакта хәбәрдар итә, — диде ул.
Туристларны 308 отель кабул итәчәк. «Бүген кунакханәләр тулылыгы 70 процент дип фаразлана. 2-5 гыйнварда — 80 процент, 6-9 гыйнварда кунакханәләр тулылыгы 50 процент тәшкил итәр дип көтелә.
Ләйлә Фазлыева туристлар яратып йөри торган урыннарның берсе «Кыш бабай» экскурсиясе булуын әйтте. «Биредә кунакларны милли мохиттә каршы алачаклар. Бу экскурсия балаларда, олыларда популяр санала», — диде.
Вице-премьер бәйрәм чараларын оештыручыларга курынычсызлык чараларын тәэмин итү буенча җаваплылык йөкләнгәнен әйтте. Термометрия, санитайзерлар — барысы да булырга тиеш.