Казан-Ульяновск юлында фура белән бәрелешкән автомобильнең йөртүчесе һәлак булган
Юл-транспорт һәлакәте бүген көндез Югары Ослан районы Уланово авылы янында булган
(Казан, 30 гыйнвар, «Татар-информ»). Казан- – Ульяновск юлында фура белән кара-каршы бәрелешкән җиңел машина йөртүчесе һәлак булган. Бу турыда Югары Ослан янгын сүндерү-коткару гарнизоны җитәкчесе Эдуард Пестов хәбәр итте.
Юл-транспорт һәлакәте бүген көндез Югары Ослан районы Уланово авылы янында булган. Беренчел мәгълүматлар буенча, 9нчы модель «Лада» автомобилен йөртүче каршы як полосага чыккан һәм «Скания» фурасы белән кара-каршы бәрелешкән.
Бәрелешү аркасында, җиңел машина металл өеменә әверелгән, ә йөртүче салонда кысылып калган.
«Янгын сүндерүчеләр махсус инструментлар белән «Лада» автомобиленең тәрәзәләрен алган, ишекләрен ачкан, кузовын, түбәсен һәм капотын кискән, аннары йөртүченең мәетен алган, янгын чыкмасын өчен түгелгән ягулыкны юдырткан» – дип сөйләде Югары Ослан янгын сүндерү-коткару гарнизоны җитәкчесе Эдуард Пестов.
Җиңел машинаның 60 яшьлек йөртүчесе һәлакәттә алган имгәнүләрдән шунда ук үлгән.
