Фән һәм мәгариф 1 март 2018 20:06

Казан укучысы Иннополис университеты олимпиадасында абсолют җиңүче булды

Иннополис университеты олимпиадасы җиңүчеләре һәм призерлары Россия югары уку йортларына кергәндә имтихан тапшырмаска мөмкин.

Скопировать ссылку

(Казан, 1 март, “Татар-информ”). Февраль аенда бер үк вакытта дүрт шәһәрдә - Иннополиста, Санкт-Петербургта, Минскида һәм Бишкекта узган Иннополис университеты ачык олимпиадасында Казаннан 9нчы сыйныф укучысы Илдар Гайнуллин абсолют җиңүче булып танылган. Бу хакта бүген Татарстанның Мәгълүматлаштыру һәм элемтә министрлыгы матбугат хезмәте хәбәр итте.

Олимпиадада 250 укучы катнашкан. Ярышлар ике көн барган. Ярышта Босния һәм Герцеговина, Кытай, Эстония, Венгрия, Израиль, Латвия, Нидерланд, Сербия, Азербайҗан, Төрекмәнстан, Белоруссия, Казахстан, Кыргызстан, Таҗикстан, Үзбәкстан, Украина һәм Россиянең 30 төбәгеннән укучылар җиңү өчен көрәшкән.

Олимпиада нәтиҗәләре буенча, 20 кеше җиңүче дип табылган. Тагын 13е икенче дәрәҗәдәге, 30ы өченче дәрәҗәдәге призер булган. Казаннан 9нчы сыйныф укучысы Илдар Гайнуллин максималь — 478 балл җыеп, абсолют җиңүче булып танылган.

Информатика буенча ачык олимпиада Иннополис университетында 2014 елдан уздырылып килә. Ул 2017-2018 уку елында мәктәп укучылары олимпиадасы исемлегенә кергән.

Иннополис университеты олимпиадасы җиңүчеләре һәм призерлары Россия югары уку йортларына керүдә ташлама ала. Алар керү имтиханнарын тапшырмаска мөмкин яки БДИ буенча профильле предметтан 100 балл алган кебек саналачак.

#БДИ #иннополис

Сәхифәләр

Казан укучысы Иннополис университеты олимпиадасында абсолют җиңүче булды