Казан спорт гимнастикасы буенча Россия чемпионатын кабул итәчәк
Чемпионат 2018 елның 16 апреленнән 22 апрельгә кадәр дәвам итәчәк.
(Казан, 23 декабрь, "Татар-информ"). 2018 елда спорт гимнастикасы буенча Россия чемпионаты Казанда уздырылачак.
Россия чемпионаты 2018 елның 16 апреленнән 22 апрельгә кадәр Казанда узачак, ул шәхси-команда ярышы булачак. Бу хакта ТАСС агентлыгына Россия җыелмасының өлкән тренеры Валентина Родионенко хәбәр иткән.
Ул спорт гимнастикасы буенча Россия чемпионатының традицион рәвештә февраль ахыры – март башында узуын, ярышлар нәтиҗәсендә Европа язгы чемпионатына ил җыелмасы составы формалашуын, ә аның гадәттә апрельнең икенче уртасында – май башында узуын аңлаткан. Шулай да киләсе елда Европа беренчелеге август башында Британиянең Глазго шәһәрендә узачагын, шунлыктан аңа сайлап алу Чиләбедә җәен ил кубогы ярышларында булачагын җиткергән.