Казан Сабан туен оештыручылар бәйрәмгә милли киемнән яки милли элемент белән килергә өнди
Казан Сабан туен оештыручылар милли бәйрәмгә милли киемнән яки милли элемент белән килергә чакырды. Бу хакта ТР Министрлар Кабинетында узган брифингта сөйләделәр.
«Барлык кунакларны, тамашачыларны милли киемнән көтеп калабыз, милли элемент булса да ярый. Без бик рәхмәтле булабыз. Без узган елгы Сабантуйда милли элементы булмаган кешеләргә чигелгән кулъяулыклар да тараттык. Сабантуй алдыннан без, дәүләт эшлеклеләре, үзебез дә кием уйлап баш ватабыз», – дип сөйләде Казан шәһәре башкарма комитеты җитәкчесенең социаль мәсьәләләр буенча урынбасары Гүзәл Сәгыйтова
Бөтендөнья татар конгрессының башкарма комитеты җитәкчесе Данис Шакиров фикеренчә, беренче чиратта үрнәкне дәүләт эшлеклеләре күрсәтергә тиеш. Ул «милли кием»гә ачыклык кертте.
«Милли кием дип еш кына фольклор коллективы кигән костюмга басым ясыйлар. Милли кием фольклор кием дигән сүз түгел. Стильләштерү мәсьәләсе бар. Ул бер яулык та була ала. Милли төсмер чагылдырган элемент булырга мөмкин. Ир-атта төп күрсәткеч түбәтәй. Милли төсмер бирә торган элементлар да милли кием күрсәткече булып тора», – диде ул.