Казан Россиядә җәйге ял өчен иң уңайлы шәһәрләр исемлегенә керде
Казан быел җәй көне минималь чыгымнар белән ял итәргә мөмкин булган Россия шәһәрләре рәтенә керде. Бу хакта RT сәяхәтләрне планлаштыру өчен сервис аналитикларын тикшерүгә сылтама ясап хәбәр итә.
Рейтингның лидеры Чувашия башкаласы Чабаксар шәһәре булды.
«Россия шәһәрләре арасында иң уңайлысы Чувашия башкаласы, Чабаксарга сәяхәт булды. Очыш якынча 4,4 мең сум тора, яшәү – тәүлегенә якынча 3 мең сум. Монда сезне төзекләндерелгән яр буе, Иделгә панорама һәм «Яклаучы Ана» мәһабәт монументы каршы алачак», - дип сөйләделәр аналитиклар.
Икенче урында Киров: «ашыкмый торган тормыш ритмы, атмосфералы урамнары һәм Вятканың В.М. һәм А.М. Васнецовлар исемендәге сәнгать музее булган бу уңайлы төбәк үзәге – тынычлык һәм мәдәни тәэсирләр эзләүчеләр өчен идеаль сайлау мөмкинлеге».
Аналитиклар архитектураны сөючеләр өчен Ярославльне тәкъдим итә һәм җәйне Санкт-Петербургта, Архангельскида, Псковта, Самарада, Тамбовта, Казанда һәм Мурманскида бик кыйммәт булмаган бәягә уздырырга мөмкин булуын билгеләп үтә.
Чит ил юнәлешләре арасында иң уңайлылары дип Беларусьта Минск, Могилев һәм Гомель, Әрмәнстанда Гюмри, шулай ук Үзбәкстанда Бохара һәм Ташкент аталды.