Архив 3 апрель 2010 11:02

Казан мэры Илсур Метшин Пасха бәйрәме белән котлый

Тәбрикнамәдә искәртелгәнчә, 2010 елда бу олуг бәйрәмне барлык христианнар да бер үк көнне үткәрә

Скопировать ссылку

(Казан, 3 апрель, “Татар-информ”). “Казанның барлык христианнарын да Христосның үлгәннән соң терелү бәйрәме белән чын күңелдән котлыйм! Христиан дөньясының ихластан ышану, мәрхәмәтлелек һәм гаделлек тантана итүен символлаштырган, яратуга һәм башкаларның хәленә керә белүгә өндәгән зур бәйрәме диндарларны берләштерә, йөрәкләрне шатлыкка күмә”, - дип бәйрәм уңаеннан җәмәгатьчелеккә мөрәҗәгать итә Казан шәһәре мэры Илсур Метшин.

Котлауда искәртелгәнчә, 2010 елда бу олуг бәйрәмне барлык христианнар да бер үк көнне үткәрә. Пасха тантаналары үзара аңлашуны ныгытуга, рухи гомумкешелек кыйммәтләрен раслауга ярдәм итә. Шуларга кушылып, Казанда яшәүче төрле милләтләрнең һәм диннәрнең культурасын хөрмәт итеп һәм өйрәнеп, христианнар шәһәребездә тату күршеләрчә мохитне саклауга, рухи баюга булыша, дигән фикер белдерә шәһәр башлыгы. “Бу шатлыклы бәйрәм йөрәкләребезгә өмет һәм киләчәккә ышаныч иңдерсен. Казан христианнарының һәрбарчасына сәламәтлек, бәхет, яңа эшләр, казанышлар өчен рух ныклыгы телим”, - диелә әлеге тәбрикнамәдә.

Сәхифәләр

Казан мэры Илсур Метшин Пасха бәйрәме белән котлый