Архив 22 март 2010 17:29

Казан мэриясе “Җир сәгате” акциясенә кушылачак

Бүген шәһәр җитәкчелегенең “дүшәмбе киңәшмәсе”ндә шул хакта сүз булган

Скопировать ссылку

(Казан, 22 март, “Татар-информ”). Бөтендөнья кеше аягы басмаган табигать фонды тарафыннан 27 мартка билгеләнгән әлеге акциягә кушылып, Казан шәһәре Башкарма комитеты һәм Казан Ратушасы биналарының тышкы яктырткычлары 1 сәгатькә сүндерелеп торачак, дип белдерде бүген “дүшәмбе киңәшмәсе”ндә Башкарма комитет җитәкчесе Рәфис Борһанов, диелә мэрия хәбәрендә. Сәламәт планета өчен шул рәвешле “тавыш бирү” юлы белән һәркем планетада климат үзгәрү куркынычы проблемасына үзенең битараф булмаганын белдерә ала, казанлыларны да бу акциядә катнашырга чакырабыз, ди мөрәҗәгатендә Р.Борһанов.

“Җир сәгате” акциясе ул көнне 20.30 сәгатьтән башлана. Былтыр Җир шарында яшәүче йөзләгән млн. кеше 1 сәгатькә ут сүндереп торган булган, акциядә Россия Федерациясенең дистәдән артык субъекты, 20 шәһәре катнашкан.
“Җир сәгате” акциясе вакытында, кагыйдә буларак, түбәндәгеләр сүндереп торырга тәкъдим ителә, дөрес, һәр очрак индивидуаль:
бүлмәләрдәге, офислар һәм йортлардагы өске яктырткычлар;
җәмәгать куркынычсызлыгына тәэсир итми торган тышкы яктырткычлар;
компьютерлар;
бәйрәм иллюминацияләре;
неон реклама алтакталары;
телевизорлар;
өстәл лампалары;
кирәкмәс электр приборлары һ.б.

Сәхифәләр

Казан мэриясе “Җир сәгате” акциясенә кушылачак