Дин 4 август 2017 14:44

Казан мәчетләренең Корбан бәйрәменә әзерлеген 20 августтан тикшерә башлаячаклар

Бәйрәм җиткәнче Казанда мәчет территорияләрен этләр ярдәмендә тикшерәчәкләр, аннан соң алар полиция сагы астына алыначак.

Скопировать ссылку

(Казан, 4 август, "Татар-информ"). Татарстан Диния нәзарәтендә Казанда Корбан бәйрәмен уздыруны оештыруга багышланган киңәшмә үтте. Бу хакта нәзарәтнең матбугат хезмәте хәбәр итә. Сөйләшүдә Казан имамнары һәм шәһәр хакимияте, Роспотребнадзорның Татарстан идарәсе вәкилләре катнашты.

2017 елда Корбан бәйрәме 1 сентябрьгә туры килә.

Татарстан мөфтие урынбасары Рөстәм хәзрәт Вәлиуллин белдергәнчә: “Бәйрәмнең оештырылу дәрәҗәсе өчен мәчет имамнары җаваплы". "Корбан бәйрәме матур һәм тәртипле узарга тиеш”, - диде ул.

Казанның Вахитов районы баш ветеринар табибы Илгиз Камалов санитария-гигиена нормаларын үтәү мөһимлеген искәртте. “Мәчет территорияләрен ит комбинатына әверелдерергә кирәкми”, - дип кисәтте ул имамнарны.

Россия Эчке эшләр министрлыгының Казан буенча идарәсе җәмәгать тәртибен саклау бүлеге җитәкчесе урынбасары Фәнис Назметдинов сүзләренчә, бәйрәм җиткәнче Казанда мәчет территорияләрен этләр ярдәмендә тикшерәчәкләр, аннан соң алар полиция сагы астына алыначак. 20 августтан мәчетләрнең Корбан бәйрәменә әзерлеген тикшерә башлаячаклар.

#Корбан бәйрәм #ДУМ РТ

Сәхифәләр

Казан мәчетләренең Корбан бәйрәменә әзерлеген 20 августтан тикшерә башлаячаклар