Хәвеф-хәтәр 2 ноябрь 2019 11:35

Казан кунакханәсендә футболчы балалар агуланганнан соң җинаять эше ачылган

Хастаханәгә алты баланы китергәннәр, алар косу һәм эч авыртуга зарлана.

Скопировать ссылку

(Казан, 2 ноябрь, «Татар-информ»). Казанның «Кристалл» кунакханәсендә яшь футболчылар агуланганнан соң җинаять эше ачылган. Бу хакта «Татар-информ» агентлыгына Россия Тикшерү комитеты ТР буенча идарәсе җитәкчесенең өлкән ярдәмчесе хәбәр итте.

7-10 яшьлек балалар Татарстан башкаласына Россиянең төрле төбәкләреннән ярышларда катнашу өчен килгән һәм «Кристалл» кунакханәсендә тукталган. 1 ноябрьдә балалар эчләре авырту, косуга зарланган һәм кунакханәгә ике ашыгыч ярдәм бригадасын чакырганнар.

Тикшерүчеләр ачыклаганча, 1 ноябрьдә Казанда 31 бала хастаханәгә мөрәҗәгать иткән. Табиблар караганнан соң, 6 баланы хастаханәгә озатканнар.

Башлангыч мәгълүматларга караганда, барлык балалар да кунакханәнең ресторанында тукланган. Әлеге факт буенча «Куркынычсызлык таләпләренә җавап бирми торган хезмәтләр күрсәтү» маддәсе буенча җинаять эше кузгатылган.

Моңа кадәр «Татар-информ» агентлыгы ТР прокуратурасының гаммәви мәгълүмат чараларында дөнья күргән, балаларның агулануы турындагы мәгълүматны тикшерүе хакында хәбәр иткән иде.

Соңрак ТР Сәламәтлек саклау министрлыгында шәһәрнең йогышлы авырулар хастаханәсенә агулану билгеләре белән 6 бала китерелүен расладылар. Табиблар аларның хәлен канәгатьләндерерлек дип бәяли.

#агулану

Сәхифәләр

Казан кунакханәсендә футболчы балалар агуланганнан соң җинаять эше ачылган