Казан консерваториясе студентлары Болгар дәвере музыкасын торгыза
Шигъри-музыкаль кичә 18 декабрьдә 17.00 сәгатьтә була.
(Казан, 11 декабрь, “Татар-информ”, Рузилә Мөхәммәтова). Казан дәүләт консерваториясенең халык музыка кораллары экспозициясе салонында үткәрелә торган музыкаль кичәләрнең чираттагысы «Болгар дәрвишләре сөхбәтендә» дип атала һәм 18 декабрьгә билгеләнгән. Бу хакта шигъри-музыкаль кичәне оештыручы Казан консерваториясе галиме, сәнгать фәннәре кандидаты Геннадий Макаров хәбәр итә.
“Кичә Урта гасыр дәверендәге Болгарга, Болгар хәкиме Айдар хан, аның кызы Туйбикә һәм Габдерахман сәхабә яшәгән заман сәнгатенә багышлана. Болгар халкы гыйлемгә, сәнгатькә омтылышы белән дан казанган. Хан сараенда шагыйрьләр, музыкантлар иҗат иткән. Болгарда суфый-дәрвишләр хәрәкәте киң җәелгән”, - ди Геннадий Макаров.
Концертта Урта гасыр татар музыкасы классикасына хас дәф, думбра, танбур кебек музыка кораллары яңгырашларын, гаруз вәзене тәэсире аша барлыкка килгән ритмнар яңгыраячак. Композиция авторы - Геннадий Макаров.
Башкаручылар – Казан дәүләт консерваториясенең татар музыкасы һәм этномузыкология кафедрасы студентлары.
Шигъри-музыкаль кичә 17.00 сәгатьтә башлана.