Казан халкын “Беренче сыйныф” гомумшәһәр бәйрәменә чакыралар
Программада балалар өчен уен зонасы, белем лекториясе, экологик мастер-класслар, Казан оешмаларыннан фудкорт каралган.
(Казан, 31 август, “Татар-информ”). Казанда 1 сентябрьдә Белем көне уңаеннан “Беренче сыйныф” гомумшәһәр бәйрәме оештырыла. Бу хакта Татарстан башкаласы мэриясе порталында хәбәр ителә.
Программада балалар өчен уен зонасы, белем лекториясе, экологик мастер-класслар, Казан оешмаларыннан фудкорт, спорт мәйданчыгы, Doratti музыкаль төркеме чыгышы каралган. Мәйданда авиатренажер - самолет уникаль симуляторы эшләячәк.
“Прометей” фәнни-тикшеренү институты “Космическая соната” музыкаль фильмын һәм авторы Булат Галиев аңлатмалары белән әзерләнгән “Космический одуванчик” слайдлы музыкаль программасын тәкъдим итәчәк.
- Бәйрәм КНИТУ-КАИның (Четаев урамы,18) 2нче уку бинасында уза, 13.00 сәгатьтә башлана.