Казан федераль университеты метеорологы бер атнага һава торышын фаразлады

Бу атнада Татарстанда аномаль эсселек кимүгә бара. Ул көнбатышка китә торган антициклон ярдәмендә мөмкин булды. Казан федераль университеты профессоры, география фәннәре докторы Юрий Переведенцев «Татар-информ»га якын көннәргә һава торышы фаразын хәбәр итте.

«Май ахырында безнең июль һава торышы булды, ул бу вакытта кирәк түгел иде. Хәзер блоклаучы антициклон читкә китә башлады. Екатеринбургта бүген эсселек, төтен тора. Ә бездә атна буе климат нормасына якын уңайлы һава торышы була. Бу атнада температура фоны 2-3 градуска югарырак көтелә, ул июнь башы һава торышына туры килә», - диде ул.

КФУ профессоры мәгълүматлары буенча, май аенда Казанда 23 мм явым-төшем (норма - 41 мм) булды, ә бу явым-төшемнең шактый җитмәвенә китерде.

«Россиянең Европа өлешенең көнчыгышында торган блоклаучы антициклон безгә яңгырлы циклоннарны кертмәде. Май безнең төбәктә коры ай булды, бу янгын куркынычына китерде. Хәзер циклон чигенә, көнбатышка бара», - дип аңлатты Переведенцев.

«Казан-Опорная» метеостанциясе мәгълүматлары буенча, май аенда уртача айлык температура нормасы Татарстан башкаласында +13,3 градус тәшкил итә. Ул өч градуска югарырак булып чыкты. Бу айда башта кырау күзәтелде, чәчүлекләр зыян күрде, ә майның икенче яртысында җәйге эсселек килде.

Соңгы көннәрдә Россия Гидрометеорология үзәге берничә тапкыр һава шартларының начараюы һәм шторм кисәтүләре турында мәгълүмат бастырды. Әйтик, 30 майда республика территориясендә урыны белән яшенле яңгыр һәм көчле җил фаразлана, аның тизлеге секундына 15-20 метрга кадәр, ә урыны белән 23 метрга кадәр җитәргә мөмкин.

31 майда Татарстанда аязучан болытлы һава торышы көтелә. Урыны белән кыска вакытлы яңгыр, яшен көтелә, урыны белән боз яварга мөмкин. Җил көнчыгыштан көньяк-көнбатышка күчүчән, урыны белән тизлеге секундына 15-20 метрга, көчәйгәндә 23 метрга кадәр җитә. Төнлә һаваның минималь температурасы +15..+20 градус, көндез исә максималь температура +21..+26 градус була, көнчыгышта һава температурасы 31 градуска кадәр күтәрелә.

1 июньдә алмашынучан болытлы һава саклана. Төнлә һәм иртән урыны белән кыска вакытлы яңгыр һәм яшен булырга мөмкин. Җил төньяктан, яшен вакытында секундына 15-20 метрга кадәр көчәюе мөмкин. Төнлә һаваның минималь температурасы +11..+16 градус җылы, ә көндез һаваның максималь температурасы +21..+26 градус дәрәҗәсендә булыр дип көтелә.