Казан чыгарылыш сыйныф укучыларының 60 проценты профильле математикадан БДИ тапшырачак
Казанның 9нчы сыйныф укучылары арасында география, информатика һәм җәмгыять белеме иң популяр сайлап тапшыра торган фәннәр булган. Бу хакта эшлекле дүшәмбе киңәшмәсендә шәһәр башкарма комитетының мәгариф идарәсе башлыгы Ирек Ризванов хәбәр итте.
Аның сүзләренә караганда, тугызынчы сыйныф укучыларының 40,6 проценты ТДИ тапшыру өчен география, 40,1 проценты информатика, 36,7 проценты җәмгыять белемен сайлаган.
11нче сыйныф укучылары арасында иң популяр фән – профильле математика. Аны укучыларның 60 проценты тапшырырга планлаштыра. Лидерлар өчлегенә шулай ук җәмгыять белеме (34 процент) һәм информатика (24 процент) кергән.
2026 елда Казанда дәүләт йомгаклау аттестациясен барлыгы 23,1 меңгә якын укучы уза. Шуларның 16,1 меңе 9нчы сыйныфны, ә 6,9 меңе 11нче сыйныфны тәмамлый.
