Җәмгыять 18 сентябрь 2014 18:02

Казан Анестезиолог һәм реаниматологлар федерациясенең XIV корылтаен кабул итәргә әзерләнә

Анестезиолог һәм реаниматологлар федерациясе корылтае ике елга бер тапкыр үткәрелә

Скопировать ссылку

(Казан, 18 сентябрь, “Татар-информ”). Россия анестезиолог һәм реаниматологлар федерациясенең традицион корылтае быел Казанда 20-22 сентябрьдә узачак. Аның рәсми ачылышы 20 нче сентябрь көнне Казанның “Корстон” комплексында көтелә. Бу хакта ТР Сәламәтлек саклау министрлыгының матбугат хезмәте хәбәр итә.

Белгечләрнең көндәлек практикасына Россия һәм чит илләрнең иң яхшы тәҗрибәсен кертү – булачак чараның төп максаты. Корылтайның шигаре – “Анестезиология һәм реаниматологиядә визуализация”.

Анестезиолог һәм реаниматологлар федерациясе корылтае ике елга бер тапкыр үткәрелә. Анда Россия һәм чит илләрнең төрле шәһәрләреннән йөзләрчә белгеч катнаша. Чара программасы анестезиология-реаниматологиянең теоретик мәсьәләләре буенча фикер алышуга багышланган 20 ләп фәнни секцияне, мастер-классларны, тармакның актуаль мәсьәләләрен хәл итүгә юнәлдерелгән дискуссияләр һәм түгәрәк өстәлләрне үз эченә ала.

Съездда катнашучылар кардиохирургия һәм кардиологиядә, акушерлыкта, гинекологиядә, педиатриядә, торакаль хирургиядә, нейрохирургиядә, неврологиядә анестезия һәм интенсив терапия үзенчәлекләре турында фикер алышачак.

Съездның фәнни эше белән параллель рәвештә, анестезиология һәм реаниматология өчен җиһазлар, чыгым материалларын, дару чараларын җитештерүчеләр күргәзмәсе оештырыла. 80 нән артык компания үзенең катнашачагын раслаган.

Сәхифәләр

Казан Анестезиолог һәм реаниматологлар федерациясенең XIV корылтаен кабул итәргә әзерләнә