"Казан" аэропортына зыян салган машина йөртүче мәҗбүри дәвалануга җибәрелгән
Суд карары нигезендә, Руслан Нуретдиновны хастаханәгә урнаштырачаклар.
(Лаеш, 30 июнь, "Татар-информ"). Бүген Татарстанның Лаеш районы суды узган елның декабрендә “Казан” халыкара аэропортына машинасы белән килеп кергән “җилкуар”га карата хөкем карары чыгарды. Аның нигезендә, Руслан Нуретдинов мәҗбүри дәвалануга җибәреләчәк. Дәвалау курсы тәмам булгач, аның язмышын медицина хезмәткәрләреннән торган эксперт коллегиясе хәл итәчәк. Коллегия карары нигезендә тернәкләндерү үткәрү билгеләнәчәк яки дәвалану вакыты озайтылачак.
Исегезгә төшерәбез, әлеге хәл узган елның 21 декабрендә булды: 15 нче модель "Лада" автомобиле белән Руслан Нуретдинов "Казан" халыкара аэропорты территориясенә бәреп керә.
Нуретдинов берничә тапкыр аэропортның терминал ишегенә бәрелә, башка объектларга да зыян сала, бер полиция хезмәткәре дә имгәнә. Аэропортка салынган гомуми зыянның күләме 3 миллион сумтәшкил иткән.
Тикшерү барышында Нуретдинов журналистларга булган хәлләрне үзенчә бәян итте. Машина йөртүче сүзләренчә, ул үзенә һәм сөйгәненә куркыныч янаганлыктан бу адымга барган.
