Кайбычта ел тәрбиячесен ачыкладылар
Олы Тәрбитнең «Карлыгач» балалар бакчасы тәрбиячесе «Ел тәрбиячесе – 2019» республика бәйгесенең муниципаль этабында беренче урынга лаек булды.
(Кайбыч, 2 февраль, «Татар-информ», «Кайбыч таңнары», Фирәдә Сайранова). Олы Кайбычның «Миләшкәй» балалар бакчасында үткәрелгән әлеге бәйгедә төрле авыллардан килгән алты тәрбияче үзләренең осталыкларын күрсәтте, чыгышларында балаларны яратулары ачык күренде. Бу турыда җирле басма хәбәр итә.
Муниципаль этап бер теманы чагылдырган ике төрле биремнән торды. Тәрбиячеләр иҗади презентация тәкъдим итте һәм балалар белән берәр чара үткәрде. Аның темасын һәм үткәрү формасын һәр педагог үзе билгеләде.
Нәтиҗәдә, «Миләшкәй» балалар бакчасы тәрбиячесе Талия Кәлимуллина, Ульянковоның «Кояшкай» балалар бакчасыннан Марина Кармаенкова һәм Иске Тәрбитнең «Гөлбакча»сыннан Гүзәл Вахитова лауреат исемен яулады. Олы Тәрбитнең «Карлыгач» балалар бакчасыннан Гөлназ Гыйбадиева беренче урынга лаек булды.
Олы Кайбычның «Миләшкәй» балалар бакчасы логопеды Юлия Сабитова икенче урынны, ә шушы ук балалар бакчасы тәрбиячесе Светлана Әүхәтшина өченче урынны алды.
Лауреатларга һәм призерларга Рәхмәт хатларын мәгариф бүлеге начальнигы Илмас Хәмидуллин тапшырды. 1-2 урыннарны яулаган педагоглар район данын бәйгенең 18 февральдә Лаеш районда узачак зона этабында яклаячак.