Кайбыч Үзәк район хастаханәсендә яңа баш табиб
Бүген районда Татарстан сәламәтлек саклау министры Гадел Вафин булып киткән.
(Казан, 22 сентябрь, "Татар-информ"). Бүген Кайбыч муниципаль районына Татарстан сәламәтлек саклау министры Гадел Вафин килде, дип яза "Кайбыч таңнары" газетасы.
Район башлыгы Альберт Рәхмәтуллин белән бергә ул Үзәк район хастаханәсе коллективы белән очрашкан. Әлеге очрашуда коллективка яңа баш табиб тәкъдим ителгән.
Министр боерыгы нигезендә, әлеге вазифага Гөлнара Сафиуллина билгеләнгән. Ул моңа кадәр хастаханәнең баш табибы урынбасары булып эшләгән.
Кырык елдан артык район халкының сәламәтлеген саклаган Татарстан Республикасының атказанган табибы Газимагомед Магомедовка район башлыгы Рәхмәт хаты һәм истәлекле бүләк тапшырган.
