Кайбыч укучылары каратэ буенча җиңү яуладылар
Спортчы егетләр Мактау кәгазьләре һәм медальләр белән кайтты.
(Кайбыч, 9 март, "Татар-информ", "Кайбыч таңнары"). Яр Чаллы каласында каратэ буенча Татарстан Республикасы беренчелегенә үткән ярышларда Владислав Васильев шәкертләре ышанычлы чыгыш ясадылар. Бу турыда җирле басма хәбәр итә.
Республика беренчелегенә үткән ярышта Апас, Кайбыч, Түбән Кама районнары, Буа, Яр Чаллы, Түбән Кама шәһәрләре командалары катнашты. Спортның бу төре буенча бәйгедә 300 гә якын яшь каратэчы чыгыш ясады.
Район данын Колаңгы авылыннан Никита һәм Владислав Козловлар яклады. Алар икесе дә 50 килограммга кадәр үлчәү авырлыгында призлы урыннарны яуладылар. Никита – беренче, Владислав – өченче урында. Туган районнарына егетләр Мактау кәгазьләре һәм медальләр белән кайтты.
