Кайбыч Кошман авылында җырчы Хәния Фәрхигә багышланган китапны тәкъдим иттеләр
Хәния Фәрхи 30 еллык сәхнә гомерендә 700дән артык җырны халыкка таныта һәм 6000гә якын концерт куя.
(Кайбыч, 8 февраль, "Татар-информ", "Кайбыч таңнары", Лейсан Саттарова). Язучы, "Казан утлары" журналының проза бүлеге мөхәррире Айгөл Әхмәтгалиева "Хәния" исемле китап чыгарган. Аны Кошман авылы китапханәчесе Гөлия Сафиуллина да яратып укыган һәм, мәдәният йорты методисты Ләйсән Гыйрфанова белән берлектә, әлеге китапны тәкъдим итү кичәсен оештырды. Бу турыда җирле басма хәбәр итә.
Бу чарага моңлы сандугачның иҗатын яратучылар, аның үзен хөрмәт итүчеләр җыелды.
Хәния Фәрхи 30 еллык сәхнә гомерендә 700дән артык җырны халыкка таныта һәм 6000гә якын концерт куя. Очрашуда аның җырларының кайберләрен кабат тыңлап хозурландык. Авылыбызның үзешчән җырчысы Инсаф Хәмзин, Кошман мәктәбе укучылары Кадрия Хикмәтуллина белән Ләйлә Гыйрфанова башкаруындагы җырларын да яратып тыңладык.