Касыйм шәһәренең борынгы мөселман зиратында кабер ташларын җимергәннәр
Касыйм шәһәренең (Рязань өлкәсе) борынгы мөселман зиратындагы дүрт кабер ташына зыян салганнар. Рязань өлкәсе татарларының төбәк милли-мәдәни мөхтәрияте шурасы рәисе Илдар Бикуев хәбәр иткәнчә, һәйкәлләрне беркетү элементлары белән бергә кубарганнар. Алар арасында Бөек Ватан сугышы ветераны Мәхмүт Абдулла улы Дәүлицаровның да кабер ташы бар.
Фото: © Россия Федерациясе мөселманнары Диния идарәсе
Әлеге вандализм очрагына бәйле җинаять эше кузгатылачак, дип хәбәр итә Россия Федерациясе мөселманнары Диния идарәсенең Telegram-каналы.
Фото: © Россия Федерациясе мөселманнары Диния идарәсе
Касыйм татар зираты 1789 елда нигезләнгән. Биредә XVIII йөз ахыры каберләре сакланган. Күпчелеге XIX-XX гасыр башына карый, ташлардагы язулар гарәп графикасында иске имляда язылган. Борынгы зиратта Касыймның атаклы татар нәселләре - Янбаевлар, Шакуловлар, Ишимбаевларның гаилә каберлекләре сакланган.