news_header_top
Руc Тат
16+
news_header_bot
news_top
Мәдәният 16 июль 2014 14:43

Кариевлылар балалар йортында тәрбияләнүчеләргә хәйрия итеп “Супер-светофор” спектакле күрсәтте, велосипед бүләк итте

Чыннан да, Рамазан - изге гамәлләр ае

Скопировать ссылку

 (Казан, 16 июль, “Татар-информ”). Габдулла Кариев исемендәге Татар яшь тамашачылар театры артистлары ел дәвамында балалар йортларында, мөмкинлекләре чикләнгән сабыйларга хәйрия спектакльләре куйды. Хәзер рамазан аенда кариевлылар изге эшләрне бигрәк тә күңел биреп башкара. Шушы изге нияттән, Кариев театры артистлары Яшел Үзән районының Норлат балалар йортында тәрбияләнүчеләр янына “Супер-светофор” спектакле белән кунакка барды, дип хәбәр иттеләр театрның матбугат хезмәтеннән.

Кариевлылар күрсәткән тамаша балаларга бик ошады. “Супер-светофор” да актерлар белән бергә, сәхнәдә курчаклар да “уйный”. Спектакль музыкаль һәм интерактив рәвештә бара. Шуңа да балалар үзләре дә артистлар белән бергә кушылып биеде, юл билгеләренә кагылышлы сорауларга җавап бирде, күңел ачты.

Тагын да күңеллерәк мизгел, спектакль азагында булды. Г. Кариев театры балаларга бүләккә велосипед алып килгән иде. Нәниләрнең велосипедлы булуларына ничек сөенгәннәрен күрүе – үзе бер шатлыклы вакыйга. Әле берсе, ул арада икенчесе велосипед тәгәрмәчләрен әйләндерергә чиратка бастылар. Әйе, әлеге балаларның юлында да “яшел ут” күбрәк янсын иде.

Норлат балалар йорты җитәкчелеге әлеге чараны оештырганы өчен театр директоры Мансур Ярмиев исеменә рәхмәт хаты, артистларга балалар ясаган чәчәк букетлары бүләк иттеләр.

Норлат балалар йорты 1942нче елда ачыла, шуннан бирле анда балаларның бетеп торганы юк. Бүгенге көндә биредә 37 бала тәрбияләнә. Аларның барысының да диярлек әти-әнисе исән: күбесе эчкечелек аркасында ата-ана булу хокукыннан мәхрүм ителгәннәр. Табигать кочагында урнашкан әлеге йортка Казан, Яшел Үзән шәһәрләреннән дә балалар китерелә, диелә әлеге хәбәрдә.

news_right_1
news_right_2
news_bot