Канадада башкорт милли герое Салават Юлаевның 265 еллыгын билгеләп үттеләр
Шулай ук шагыйрьнең шигырьләрен укыдылар һәм аның иҗади мирасы турында сөйләштеләр.
(Казан, 17 июнь, «Татар-информ»). Канадада башкорт милли герое Салават Юлаевның 265 еллыгын билгеләп үттеләр. Шагыйрьнең шигырьләрен укыдылар һәм аның иҗади мирасы турында сөйләштеләр. Бу хакта Бөтендөнья татар конгрессы матбугат хезмәте хәбәр итә.
Экран аша Салаватның Эстония җирендә булуы турында китап төзү тарихы белән таныштылар. Канада Корылтае үз китапханәсендә бу китапны булдырырга, шулай ук Эстониядәге ватандашлар белән дустанә элемтәләр урнаштырырга хыяллана.
Салават Юлаев тууына 265 ел булуны бәйрәм итүнең төп вакыйгасы булып Канада Корылтай әгъзаларының төрек скульпторы Рухи Туна остаханәсенә баруы булды. Ул анда үзенең яңа эшен — башкорт герое бюстын эксклюзив рәвештә тәкъдим итте. Әлегә бу балчык скульптура. Алда бик күп этаплар —форма салу, материалга заказ бирү, скульптура булдыру һәм аны тәмамлау эшләре тора.