Камил хәзрәт һәм Васил Шәйхразыев хәләл индустрияне үстерү хакында фикер алышты
23 гыйнварда Диния нәзарәтендә Татарстан мөфтие Камил хәзрәт Сәмигуллин Татарстан Республикасы Премьер-министры урынбасары, Бөтендөнья татар конгрессының Милли Шура рәисе Васил Шәйхразыев белән очрашты. Әлеге чарада шулай ук Татарстан мөфтиятенең «Хәләл» стандарты комитеты җитәкчесе Габбас хәзрәт Шляпошников катнашты. Бу хакта ТР Диния нәзарәте матбугат хезмәте хәбәр итә.
Очрашу барышында җитәкчеләр Татарстанда хәләл индустрия үсешенең стратегик юнәлешләре, халыкара аккредитация мәсьәләләре, актуаль бурычлар хакында фикер алышты һәм 2026нчы елга хезмәттәшлек планнарын раслады.
Васил Шәйхразыев мөфти Камил хәзрәткә татар-мөселман традицияләрен саклауда һәм ныгытуда актив ярдәм күрсәткәне, Татарстанда һәм Россиядә хәләл индустрияне үстерү буенча зур хезмәтләре өчен ихлас рәхмәтен җиткерде.