Спорт 6 февраль 2022 09:23

Камилә Вәлиева Олимпиадада кыска программада җиңде

Олимпиаданың команда турнирында Россия АКШны узды.

Скопировать ссылку

(Казан, 6 февраль, «Татар-информ», Артур Хәлилуллов). Камилә Вәлиева Пекинда уза торган Олимпия уеннарында фигуралы шуу буенча команда турнирының кыска программасында җиңде.

Ул барлык элементларны да чиста башкарды, барлык көндәшләрен дә зур аерма белән артта калдырды. Спортчы 90,18 балл җыйды.

15 яшьлек спортчының әлеге уңышы Россия җыелма командасына команда турнирының гомуми зачетында АКШны узып китәргә ярдәм итте.

Американың фигуралы шуу остасы бүген тупас хата җибәрү аркасында бары тик бишенче урынга гына лаек булды.

Кыска программада Япония спортчысы Вакаба Хигучи – икенче, Канада вәкиле Маделин Скиза өченче урынны яулады.

Моннан алдарак Марк Кондратюк команда турнирында ир-атлар арасында кыска программада өченче урынны алган иде, Виктория Синицина һәм Никита Кацалапов ритм-биюдә – икенче, Анастасия Мишина һәм Александр Галләмов исә парлы шууда шулай ук икенче урынга лаек булды.

#камилә вәлиева #Пекинда кышкы олимпиада

Сәхифәләр

Камилә Вәлиева Олимпиадада кыска программада җиңде