Камил хәзрәт Сәмигуллин: Быел рус телендә онлайн-мәдрәсә ачылачак
«Белем бирү ресурсының интернет-платформасы һәм мобиль кушымтасына ихтыяҗ шулкадәр зур булды ки, онлайн-мәдрәсәдә укуга Татарстан һәм Россия халкы гына түгел, БДБ илләре, Европа, Австралия, Америка, Кытайдан да ватандашлар кушылды», - диде мөфти.
(Казан, 12 гыйнвар, «Татар-информ», Гөлнар Гарифуллина). Татарстан мөфтие Камил хәзрәт Сәмигуллин әйтүенчә, быел рус телендә онлайн-мәдрәсә ачу ниятләнә.
«2021 елның гыйнварында татар телендә онлайн-мәдрәсә ачкан идек. Татарча гына материал бирү кулланучылар аудиториясен киметәчәген аңладык. Ләкин бу белем бирү ресурсының интернет-платформасы һәм мобиль кушымтасына ихтыяҗ шулкадәр зур булды ки, онлайн-мәдрәсәдә укуга Татарстан һәм Россия халкы гына түгел, БДБ илләре, Европа, Австралия, Америка, Кытайдан да ватандашлар кушылды», — диде мөфти Казан Кремлендәге утырышта.
Ул Идел буе Болгар дәүләтендә рәсми рәвештә ислам кабул ителүнең 1100 еллыгын билгеләп үтү кысаларында, чаралар исемлегенә рус телендә онлайн-мәдрәсә дә кертелгәнен әйтте.
«Ул проект гамәлгә ашырылгач, дөньяның теләсә кайсы ноктасыннан миллионлаган рус телле мөселманнар ислам нигезләре буенча дөрес гыйлем ала алачак. ИншаАллаһ, бу төрле радикаль интернет-мәйданчыкларга альтернатива булачак һәм халык арасында дини гыйлемсезлекне бетерүгә ярдәм итәчәк», — дип белдерде Камил хәзрәт.
Мөфти, шулай ук, 1100 еллык кысаларында Бөтенроссия мөселман яшьләре форумы оештырылачагын әйтте.