Камал театрында Татарстанның халык артисты Илдар Хәйруллинның юбилей кичәсе була
Кичәдә юбилярны укучылары котлый һәм «Исәнмесез?!..» спектакле күрсәтелә.
(Казан, 1 октябрь, "Татар-информ"). 30 октябрьдә Камал театрының Зур залында Россиянең атказанган, Татарстанның халык артисты Илдар Хәйруллинның юбилей кичәсе була. Бу турыда театрның матбугат хезмәте хәбәр итте.
Программада укучылары котлавы һәм «Исәнмесез?!..» спектакле тәкъдим ителә. Кичәнең сценарий авторы Илтөзәр Мөхәммәтгалиев, режиссеры — Радик Бариев.
Бәйрәм 19.00 сәгатьтә башлана.
Татарстанның халык артисты (1991), Россиянең атказанган артисты (1999) Хәйруллин Илдар Зиннур улы 1950 елның 6 июнендә Казан шәһәрендә туа. 1970 елда Казан театр училищесын тәмамлый һәм Татар академия театрында эшли башлый. 1975 елдан Театр училищесында актерлык осталыгы укыта. Спектакльләр куя.
Хәйруллин — күпкырлы актер. Иҗатының башлангыч чорында баш рольләрдә яшь егетләрне уйнаса, соңыннан төрле планда һәм төрле жанрда характерлар тудыру остасы.
Рольләре: Таймораз — «Борчылма, әнием» (Н.Думбадзе); Алим — «Эңгер-меңгер» (А.Гыйләҗев); Исмәгыйль — «Диләфрүзгә дүрт кияү», Григорий — «Ат карагы», Шагыйрь — «Моңлы бер җыр», Хәбир — «Сөяркә» (Т.Миңнуллин); Лауренсио — «Җүләр кыз» (Лопе де Вега); Таһир — «Мәхәббәтең чын булса» (Х.Вахит); Абдулич — «Һиҗрәт» (Н.Исәнбәт); Карандышев — «Бирнәсез кыз», Худобаев — «Җимерелгән бәхет» (А.Островский); Кияү — «Кияү белән кәләш» (М.Байҗиев); Ильяс — «Казан сөлгесе», Исмәгыйль — «Сүнгән йолдызлар» (К.Тинчурин); Максим — «Һаваларда йолдыз» (М.Горький буенча); Труффальдино — «Ике хуҗаның хезмәтчесе» (К.Гольдони); Җанбай — «Идегәй» (Ю.Сафиуллин), Карак — «Карак» (З.Хәким); Инсаф — «Әни килде» (Ш.Хөсәенов); Пеппино — «Гаугалы гаилә» (Эд.де Филиппо); Закир — «Мәхәббәт хатирәсе», Хәмзә - «GO! Баламишкин» (Ф.Бүләков); Вершинин — «Өч сеңел» (А.Чехов) һ.б.