Камал театры артисты Алмаз Борһанов Галиәсгар Камал образын гәүдәләндерде
Бүген Камал театрының кече залында татар драматургиясе классигы, күренекле җәмәгать эшлеклесе Галиәсгар Камалны искә алу кичәсе узды.
(Казан, 27 февраль, "Татар-информ", Рузилә Мөхәммәтова). Камал театры артисты Алмаз Борһанов Галиәсгар Камалның 140 еллыгына багышланган кичәдә классик драматург образын гәүдәләндерде.
Бүген Камал театрының кече залында татар драматургиясе классигы, күренекле җәмәгать эшлеклесе Галиәсгар Камалны искә алу кичәсе узды. Галиәсгар Камалның тәрҗемәи хәле һәм иҗаты турында Луара Шакирҗанова һәм классик драматург образындагы Алмаз Борһанов сөйләде.
Камал театры артистлары кайчандыр театр репертуарында булган Галиәсгар Камал әсәрләрен яңарттылар. Сәхнәдә "Беренче театр", "Банкрот" һәм башка спектакльләреннән өзекләр күрсәтелде.
Кичәнең сценарий авторы, режиссер һәм кичәне алып баручы - Татарстанның халык артисткасы Луара Шакирҗанова.
Кичә Камал театрының кече залында аншлаг белән үтте. Залда Камалның нәсел дәвамчылары, шулай ук ТР мәдәният министры урынбасары Дамир Натфуллин да бар иде.
