Камал театры Александринский фестивалендә катнашачак
21 һәм 22 сентябрь көннәрендә Санкт-Петербургта Александринский театрының төп сәхнәсендә Камал исемендәге Татар дәүләт Академия театры Мәхмүт Галәүнең «Болганчык еллар. Мөһаҗирләр» спектаклен тәкъдим итә.
Тамаша Фәрит Бикчәнтәев куелышында күрсәтеләчәк. Татарстан Республикасының Санкт-Петербург шәһәрендә һәм Ленинград өлкәсендә даими вәкиллеге шул турыда хәбәр итә.
«Болганчык еллар. Мөһаҗирләр» Санкт-Петербургта XIII Халыкара «Александринский» театр фестивале кысаларында куела. Анда Мәскәү, Санкт-Петербург, Казан, Якутск һәм Псков театрлары катнаша. Фестиваль 9 сентябрьдән 2 октябрьгә кадәр дәвам итәчәк.
Спектакльдә театр оркестры башкаруында композитор Елена Шипованың музыкасы яңгыраячак. Дирижер – Данияр Соколов.