Дин 21 апрель 2024 12:23

Мисырда татар шәмаиле ясау буенча мастер-класслар үтте

Скопировать ссылку

РФ мөселманнары Диния нәзарәте һәм Россия Мөфтиләр шурасы делегациясе составында Мисырга килгән Россия Рәссамнар берлеге әгъзасы, каллиграф Чулпан Шарифуллина татар шәмаиле ясау буенча мастер-класслар үткәрде. Бу хакта Мөфтиләр шурасының матбугат хезмәте хәбәр итә.

Иҗади чаралар «Россия ислам традицияләре» Халыкара проектының бер өлеше булды һәм Берләшкән Дәүләтләр Бердәмлеге, чит илдә яшәүче ватандашлар эшләре һәм халыкара гуманитар хезмәттәшлек федераль агентлыгының Мисырдагы вәкиллеге ярдәмендә узды. Каһирәдә мастер-класслар Рус йортында һәм In the Mood рәсем сәнгате студиясендә оештырылды, анда ватандашларыбыз да, җирле халык вәкилләре дә катнашты, алар арасында яшьләр дә, олылар да бар иде. Александриядәге Рус йортында оештырылган чарада исә шәех Әбделазиз Әбү Хузейма җитәкчелегендә Әл-Әзһәр университетының Александрия бүлекчәсе студентлары катнашты.

Чулпан ханым һәр мастер-класста үзенең әзер эшләрен күрсәтте һәм татар шәмаиленең барлыкка килү этаплары хакында җентекләп сөйләде. Мастер-класста катнашучылар үз исемнәрен каллиграфик стильдә гарәпчә язды, милли татар орнаментлары белән бизәде һәм төсле карандашлар белән буяды.

#шамаил

Сәхифәләр

Мисырда татар шәмаиле ясау буенча мастер-класслар үтте