Калининградта мөселман халыклары мәдәнияте музее ачылды
2026 елның 4 апрелендә Олы Исак бистәсендә, мәчет территориясендә, Калининград өлкәсе мөселман халыклары мәдәнияте музее ачылды. Ачылу тантанасы Татарстан Республикасы Милли музееның 131 еллыгына багышланды, ә беренче экспозиция төбәк территориясендә яшәүче татарларга һәм башкортларга багышланды. Анда көнкүреш әйберләре, борынгы бизәнү әйберләре, костюмнар һәм китаплар тәкъдим ителгән. Бу хакта Калиниград шәһәренең «Кардәшләр» җәмгыять оешмасы рәисе Лилия Габбасова хәбәр итте, дип яза Бөтендөнья татар конгрессы матбугат хезмәте.
«Бу вакыйга безнең мәдәниятебезнең тере булуын, яшәү урынына карамастан, безне берләштерүен күрсәтә», – дип билгеләп үтә Лилия Габбасова. Аның сүзләренә караганда, музей барлыкка килүдә төп рольне Калининград шәһәре мөселманнарының «ИХСАН» җирле дини оешмасы рәисе Явер Гусейнов уйнаган, ул музей өчен бина биргән.
«Анда Калининград өлкәсендә яшәүче һәм ислам динен тотучы ингушларга, үзбәкләргә һәм башка халыкларга багышланган экспозицияләр барлыкка килергә мөмкин. Без барысын да күрергә бик шат булачакбыз», – дип сөйләгән Лилия Габбасова.
Үз чиратында Явер Хөсәенов кунакларга бөек кыргыз язучысы Чыңгыз Айтматов сүзләре белән мөрәҗәгать итә. «Үз нәселегезне югалтмагыз. Тиңдәшлекне югалтмас өчен, кешенең тарихы булырга тиеш һәм бу тарих киләчәк буыннар өчен сакланырга тиеш», – ди ул.
«Без сезнең балаларыгызның әтиләрегез һәм бабаларыгыз мәдәнияте турында белүләрен телибез. Һәр якшәмбе мәчеттә иртәнге 10 дан яшь буынга ислам нигезләрен өйрәтәләр. Әгәр без законсыз эшчәнлек алып барган булсак, безне күптән япкан булырлар иде», – дип билгеләп үтә «ИХСАН « җитәкчесе.
Шунысын да билгеләп үтәргә кирәк, халыкларның мәдәнияте һәм көнкүреше белән музей экспозицияләре ярдәмендә генә түгел, ә Калининград өлкәсенең милли-мәдәни оешмалары үткәрә торган милли бәйрәмнәрдә дә танышырга мөмкин. Аерым алганда, 20 июньдә «Татар-башкорт мәдәни җәмгыяте» «Кардәшләр» Сабантуй үткәрә, диелә хәбәрдә.