Сәхифәләр
«Татар-информ» мәгълүмат агентлыгы баш редакторы
Ринат Вагыйз улы Билалов
420066, Татарстан Республикасы, Казан, Декабристлар ур., 2нче йорт.
«ТАТМЕДИА» акционерлык җәмгыяте
«Татар-информ» мәгълүмат агентлыгы татар редакциясе
Баш редактор урынбасары
Зилә Мөбәрәкшина
Кайбыч районы Бәрлебашы мәктәбендә фәнни клуб ачылды
Кайбыч районы Бәрлебашы мәктәбендә «Алдынгылар» хәрәкәтенең фәнни клубын ачу тантанасы булды. Эшчәнлек «Юнистлар» — яшь тикшеренүчеләр һәм «Юннатлар» — яшь натуралистлар юнәлешләрендә алып барылачак. Бу хакта «Кайбыч таңнары» хәбәр итә.
Быел Россиянең утыз төбәгендә алты йөз фәнни клуб ачылачак. Бу клублар «Алдынгылар» хәрәкәте һәм Курчатов институты тарафыннан гамәлгә ашырылучы «Алдынгылар фән белән кызыксына» масштаблы проектының бер өлеше. Аның максаты — яшьләрне фәнни эшчәнлеккә җәлеп итү, укучыларның иҗади һәм тикшеренү инициативаларына ярдәм итү.
Тиздән Бәрлебашы мәктәбенә фән белән тирәнтенрәк шөгыльләнү өчен заманча җиһазлар кайтачак. Бу мәктәпнең биология һәм химия укытучысы Эльмира Рәхмәтуллинаның «Фәнни клублар остазлары» Бөтенроссия конкурсында җиңүе нәтиҗәсендә мөмкин булды.
«Алдынгылар хәрәкәте«нең җирле бүлеге лидеры Елена Краснова укучыларны әлеге истәлекле вакыйга уңаеннан кайнар котлады. «Укучыларга һәм остазлары Эльмира Рәхмәтуллинага яңадан-яңа эзләнүләр, кызыклы проектлар һәм гаҗәеп фәнни ачышлар телим. Фән белән кызыксынуыгыз дәвамлы булсын, ул сезнең белемегезне арттыра, дөньяны күзаллавыгызны киңәйтә», — диде ул.
Елена Краснова фәнни клубка «Биология» өстәл уены, «Алдынгылар» хәрәкәте логотибы төшерелгән панамкалар бүләк итте.
Әлеге чара кысаларында 1нче сыйныфтан алып 9нчы сыйныфка кадәрге укучылар мавыктыргыч мастер-классларда һәм тәҗрибәләрдә катнашты. Балалар сода белән серкәне кушсаң, шарны ничек җиңел генә кабартып булуын һәм башка шундый мавыктыргыч мизгелләрне кызыксынып карады.
Кызыклы яңалыкларны күзәтеп бару өчен Телеграм-каналга язылыгыз