Күзәтүчеләр Конституциягә тавыш бирүнең барлык этапларына да кертеләчәк
Конституциягә төзәтмәләргә тавыш бирүне күзәтеп тору өчен Татарстанда 10 меңнән артык кеше теркәлгән.
(Казан, 16 июнь, «Татар-информ», Зилә Мөбәрәкшина). Иҗтимагый күзәтүчеләр Конституциягә төзәтмәләр кабул итү буенча тавыш бирүнең барлык этапларын күзәтеп торачак. Бу хакта матбугат очрашуында ТР Үзәк сайлау комиссиясе рәисе Андрей Кондратьев сөйләде.
«Мөһим бурычларның берсе — тавыш бирүнең гадел булуын һәм бюллетеньнәрнең сакланышын тәэмин итү. Моның өчен сайлау комиссияләренә иҗтимагый күзәтүчеләр ярдәм итәчәк, алар процессның барлык этапларына кертеләчәк. Күзәтүчеләрнең бурычы — карап тору, сораулар бирү. Алар барлык тавыш бирү процедураларында катнашачак», — диде ул.
Кондратьев сүзләренә караганда, республикада күзәтүче булып 10 меңнән артык кеше теркәлгән. «Алар ТР Иҗтимагый палатасына киләсе тавыш бирү чарасында да күзәтүчеләр сыйфатында катнашырга гариза биргән», — дип сөйләде ул.