Мәдәният 13 сентябрь 2016 12:34

Кәрим Тинчурин театрында билет бәяләре арта

Узган сезонда К.Тинчурин театрына йөрүче тамашачылар саны да арткан.

Скопировать ссылку

(Казан, 13 сентябрь, “Татар-информ”, Лилия Локманова). К.Тинчурин исемендәге Татар дәүләт драма һәм комедия театрында быелгы 83 нче сезонда билет бәяләре артачак. Бу хакта “Татар-информ” мәгълүмат агентлыгына театр директоры Фәнис Мөсәгыйтов хәбәр итте. Аның сүзләренчә,билетларга бәяләр сизелерлек артмаячак.

“Без күп дигәндә бер рәткә бәяләрне арттырачакбыз. Мисал өчен, иң җайлы рәткә бәяләр 1 мең сум булырга мөмкин”, - диде ул.

Узган сезонда К.Тинчурин театрына йөрүче тамашачылар саны да арткан. “Без бит завод түгел. Була шундый еллар: җәй көне дә эшләргә туры килә. Мисал өчен, Универсиада вакытларында. Икенче елга, мисал өчен, төзекләндерү эшләре башларга уйладык, ди. Ул елны спектакль саны да, тамашачы саны да азрак була”, - диде Фәнис Мөсәгыйтов.

Аның сүзләренчә, тамашачыларның якынча 54 проценты комедиягә, 24-30 проценты мелодрамага, 5 проценты драмага өстенлек бирсә, калган тамашачылар төрле жанрдагы спектакльләр карарга ярата.

Узган театр сезонынң иң яхшы спектакле дип, театр директоры “Кияүләр”не атады. Исламия Мәхмүтованың “Мәхәббәт чишмәсе” спектакле дә, ничәнче сезон баруына карамастан, тамашачы яратып йөри, дип аңлатма бирде Фәнис Мөсәгыйтов.

#Кәрим Тинчурин исемендәге Татар дәүләт драма һәм комедия театры #Исламия Мәхмүтова #Фәнис Мөсәгыйтов

Сәхифәләр

Кәрим Тинчурин театрында билет бәяләре арта