Көрәш һәм хәрәм янәшә була алмый – Миңназыйм Сәфәров
Гаделсезлек аша җиңелүгә дучар булганнар оттыруын авыр кабул итә, ди журналист.
(Казан, 9 февраль, «Татар-информ», Фәрит Салихов). 10-11 февральдә Зәй шәһәренең «Яшьлек» боз сараенда «Ватаным Татарстан» республика газетасы тарафыннан гамәлгә куелган каһарман шагыйрь Муса Җәлил истәлегенә татарча көрәш буенча традицион турнир уза. “Ватаным Татарстан” газетасы баш мөхәррире Миңназыйм Сәфәров «Татар-информ» агентлыгында узган очрашуда турнирга бәя бирде.
«Ватаным Татарстан» газетасы оештырган, хәзер дә аның активлыгы, тәкъдиме һәм әйдәп баруы белән уздырыла торган ярышның ярты гасырдан артык тарихы бар. Иң дәрәҗәле республика турниры ул.
«Көндәлек газетаның, журналистиканың гомере кыска була, дисәләр дә, газетаның да, аның исеме белән бәйле әлеге турнирның да гомере озын булган. Хезмәт юлымны әлеге газета белән бәйләгән елларда, яшермим, әлеге турнирны артык бер мәшәкать буларак кабул иткән идем. Ник кирәк ул, журналистның эше – язу, ә оештыру түгел, янәсе. Оятыма күрә, ялгышуымны бик тиз аңладым. Вакыт алышынса, кыйммәтләр үзгәрсә дә, кагылгысыз, үзгәртеп булмый торган кыйммәтләр бар бит ул. Бүгенге көрәш спорт кына түгел, ә – сәнгать һәм татарның яшәү мәгънәсе. Татарны көрәшсез күзаллап булмавын, ул аның рухи халәте булуын, бил алышуларның асылын аңлый башладым. Спорт кына түгел, үзе бер фәлсәфә икән бит ул көрәш. Монда хәтта җиңелә дә белергә кирәк. Турнир һәм газетаның бердәмлеге нәтиҗәсендә көрәш дөньясында дусларым, танышларым да артты. Һәрхәлдә, кайбер көрәшчеләр мине танып, кул бирешеп күрешә башлады», – ди Миңназыйм Сәфәров.
Газета мөхәррире татар көрәшендә аяк чалу һәм хәрәмгә урын булмавын да ассызыклап узды.