"Күгәрченнәр белән кызыклы һәм маҗаралы аралашу" хәйрия акциясе Спас районында дәвам итте

(Казан, 24 апрель, "Татар-информ"). Кичә, 23 апрельдә, Спас районының Болгар интернат-мәктәбендә тәрбияләнүче сәламәтлек мөмкинлеге чикләнгән балалар янына "Татарстан Республикасы буенча Казан күгәрченнәре" үзәге активистлары килеп китте. Бу хакта Татарстан Экология министрлыгы матбугат хезмәте хәбәр итә. 

Волонтерлар "Күгәрченнәр белән кызыклы һәм маҗаралы аралашу" хәйрия проекты кысаларында экологик дәрес уздырды. Чараны Халыкара Җир көненә багышладылар. Экоактивистлар белән берлектә мәктәп укучылары белән Россиянең атказанган күгәрчен белгече – Виктор Александрович Данилов та аралашты. Укучыларга сөйләгәнчә, 70 ел дәвамында ул күгәрченнәрнең төрле токымнарын үрчетү, алга таба ярышларда катнашу өчен спортчы күгәрченнәргә күнекмәләр бирү белән шөгыльләнгән.

Ул "Казанның сиртмәле токымы" белән аеруча откан. Виктор Александрович алар белән 40тан артык халыкара һәм россиякүләм күргәзмәләрдә катнашкан. Аның спортчы күгәрченнәре берничә мәртәбә алтын медаль дә яулаган. Балалар күгәрчен үрчетү тарихы, Бөек Ватан сугышы елларында күгәрчен почтасының әһәмияте турында зур кызыксыну белән тыңлады. Бу вакытта, төрле токым күгәрченнәре каурыйларын чистартты һәм җыелган кешеләргә үзләренең гүзәл канатларын һәм койрыкларын күрсәтте. Бәйрәм күренешенә балалар янына Казан сиртмәләре, бөдрә, мәрмәр күгәрченнәр, спортчы һәм бакинскиның сугыш күгәрченнәре килгән иде. Балалар кызыклы мәгълүмат алу белән берлектә вакытларын да күңелле уздырды. Алар кошларны кулларына алды һәм истәлек өчен фотога төште.

"Һәр бала назга, күңел җылысына һәм махсус кайгыртуга мохтаҗ. Тере табигать белән аралашып, балаларда мәрхәмәтле була белү, тирә-юньдәгеләрнең халәтен аңлау сәләте формалаша", – дип билгеләде мәктәп директоры Алексей Александрович Корчагин. Ул шулай ук кошларның йөрәктәге авыртуны җиңеләйтүе, тотлыгуны, нейродермитларны һәм неврозларны бетерүе галимнәр тарафыннан расланган булуы хакында да билгеләде. Канатлы дуслар – йөрәк-кан тамырлары авыртканда "киңәш ителә", балаларны моңсуланудан, меланхолиядән һәм депрессив халәттән арындырачак.

Билгеләп узарга кирәк, "Күгәрченнәр белән кызыклы һәм маҗаралы аралашу" хәйрия акциясе 2018 елның гыйнварында старт алды. Шушы вакыт эчендә активистлар Лаешта, Азнакайда сәламәтлек мөмкинлеге чикләнгән балалар өчен һәм Балык Бистәсе районының "Акчарлак" социаль приютында шундый дәресләр уздырды, диелә министрлык хәбәрендә..