Ижауда «Үз җиремдә — үз телем» китабын тәкъдим иттеләр
Быел һәм киләсе елда китапны Россиянең татарлар яши торган 20 шәһәрендә һәм Татарстанның 10 районында тәкъдим итәчәкләр.
(Казан, 10 июль, «Татар-информ»). «Мәскәү татарлары штабы» чыгарган «Үз җиремдә — үз телем» китабын Удмуртия башкаласы Ижауда тәкъдим иттеләр.
«Мәскәү татарлары штабы» хәбәр иткәнчә, 10000 тиражда басылып чыккан китапка 110 танылган шәхеснең милләткә мөрәҗәгате, татар халкы алдында торган мөһим мәсьәләләргә карата фикерләре тупланган.
Китапның беренче презентациясе Казанның «Гранд Отель» кунакханәсендә булган иде. Китапны икенче тапкыр Удмуртия башкаласы Ижауда тәкъдим иттеләр. Шәһәрдә 100000 чамасы татар яши. Республика татарлары актив яши, милли тәңгәллекләрен саклап калырга тырыша: мәчетләр, районнарда һәм авылларда милли-мәдәни үзәкләр ачыла, традицион бәйрәмнәр һәм фестивальләр уздырыла.
«Мәскәү татарлары штабы» Ижау белән күптән хезмәттәшлек итә. Штаб шәһәргә эшлекле сәфәрләр белән килә, яшьләр оешмалары белән очраша, уртак чаралар уздыра. Ижауның М. Җәлил исемендәге китапханәсендә узган презентациягә журналистлар, язучылар, татар теле укытучылары, җәмәгать эшлеклеләре, мәдәният әһелләре килгән иде.
Тәкъдим итү кичәсендә Удмуртия Республикасының Татар иҗтимагый үзәге президенты Илсур Миңнемуллин чыгыш ясады. Ул китапка һәм «Мәскәү татарлары штабы»ның күпъеллык эшенә югары бәя бирде. Башка оешмаларны да штабтан үрнәк алырга, иҗтимагый эшчәнлектән читтә калмаска өндәде. Воткинсктан килгән шагыйрә, Удмуртиянең Язучылар берлеге әгъзасы Гөлфия Исхакова «Үз җиремдә — үз телем» китабы халык буларак татарлар абруен күтәрә, китапка авторларның мөһим фикерләре тупланган диде. Шулай ук китапны туган телен белмәгән кешеләр укый алмаячак дигән фикер дә әйтте.
«Барлык рус телле укучылар өчен китапны рус теленә тәрҗемә итәргә кирәк, аны башка илләр өчен дә тәрҗемә итү бик яхшы булыр иде. Безнең горурланырлык нәрсәләребез бар!», — диде ул.
Быел һәм киләсе елда китапны Россиянең татарлар яши торган 20 шәһәрендә һәм Татарстанның 10 районында тәкъдим итәчәкләр.