Ижевскида Сабантуйга бүләк җыйдылар
Кичә Ижевск шәһәрендә бер төркем милләттәшебез, балалар белән бергәләп, борынгыдан килгән күркәм йоланы – Сабантуйга бүләк җыюны оештырды. Әлеге матур традиция Ижевскида быел ун елдан соң үткәрелгән. Ун ел элек онытылган йоланы кабаттан яңартып җибәргәннәр. Бу хакта Бөтендөнья татар конгрессы матбугат хезмәте хәбәр итә.
Бүләк җыючылар төркеме ике урам гына әйләнсә дә, бүләкләр мулдан җыелган. Кайбер гаиләләр урам әйләнүчеләрне көтеп торган, аеруча хөрмәт белән каршы алган. Фәйрүзә апа белән Феликс абый Мансуровлар барлык кунакларны да тәмле коймак белән сыйлап, бәйрәм рухын тагын да арттырганнар.
Быел Ижевскида Сабантуй 29 июньдә үтәчәк. Ул елдагыча шәһәр ипподромында узачак.