Июль аенда Мәскәүдә Татарстан Республикасы Мәдәнияте көннәре узачак
5 июльдә (җомга) Татарстан Республикасы делегациясе бөек татар шагыйре Габдулла Тукай һәйкәленә чәчәкләр салачак.
(Казан, 23 июнь, «Татар-информ»). 2019 елның 5-7 июль көннәрендә Мәскәүдә инде традициягә кергән Татарстан Республикасы Мәдәнияте көннәре узачак. Бу хакта Бөтендөнья татар конгрессы матбугат хезмәте хәбәр итә.
5 июльдә (җомга) Татарстан Республикасы делегациясенең бөек татар шагыйре Габдулла Тукай һәйкәленә чәчәкләр салу тантанасы була. Башлана 12:00 сәгатьтә. Теләге булган һәркем чарада катнаша ала.
Адрес: Новокузнецкая урамы буенча сквер, 13/15 – 17/19, дип хәбәр итә оештыручылар.
Татарстан Мәдәнияте көннәренең төп вакыйгасы булып, Мәскәү Халыкара музыка йортында Татарстан сәнгать осталарының гала-концерты булачак. Башлана 18.00 сәгатьтә.
6 июль көнне Мәскәү дәүләт «Коломенское» музей-тыюлыгында Сабантуй-2019 гомумшәһәр бәйрәме узачак.
7 июльдә үзәк Мәскәү ипподромында «Татарстан Республикасы призларына ат чабышлары» узачак.