Ихтыяр Кыямов: Мирасны барлап яңа «йолдыз»ларны калкыту - чын мәгънәсендә милләтне саклау
Камал театрының яңа бинасында «Такташ FEST» проектын йомгаклауга багышланган әдәби-музыкаль кичә узды. Казан федераль университеты студенты Ихтыяр Кыямов әлеге проектка карата үз фикерләрен җиткерде.
- «Такташ Fest» нәтиҗәләрен чыгару кичәсендә мин тәмам мәмнүн булып утырдым. Беренчедән, татар халкының Такташ кебек даһи уллары барлыгына, икенчедән, Такташ рухы белән илһамланган шагыйрьләр, композиторлар, музыкантлар, җырчылар сәләтенә, өченчедән, Такташ иҗатына төшенә алган, аңа мөкиббән булган зыялылар барлыгына сокландым.
Милләтебезнең мәшһүр улларына багышланган күркәм һәм юмарт (монысы хәзерге вакытта аеруча мөһим!) бәйгеләр үткәрелеп торсын, күбәйсен, күләмләнсен, дигән теләк кенә белдерәсе кала. Элгәрләрнең мирасын барлап яңа «йолдыз»ларны калкыту – чын мәгънәсендә милләтне саклау ул! Традицияләрне дәвам иттерү – ул торгызылган учакны саклау, аңа утын өстәп тору, көлгә табыну түгел, ди ул.
«Такташ FEST» проектын йомгаклауга багышланган әдәби-музыкаль кичә турында тулырак «Интертат» сайтында укый аласыз.
