Истанбулда Самара татарларының милли ризыгын пешерергә өйрәткәннәр
Мастер-класстан соң Истанбулда татарча диктант язучыларга, онлайн диктантта катнашучыларга Бөтендөнья татар конгрессының Рәхмәт хатлары тапшырылган.
(Казан, 12 ноябрь, “Татар-информ”, Рузилә Мөхәммәтова). Истанбул татарлары манты һәм Самара татарлары пирогы пешерү буенча мастер-класс үткәргәннәр. Бу хакта Төркия аспиранты Зара Айгөл Кәбирова хәбәр итә.
“Бу - милли ризыкларыбызны таныту эшчәнлеге. Мантыны без Ләйсән Тапсыз белән бергә әзерләдек. Самара татарлары пирогын Яловада яшәүче Гөлнара Сакмар ясап күрсәтте. Мастер-класста барлыгы 17 кеше катнашты”, - ди Зара Айгөл Кәбирова.
“Бу беренче эшебез түгел. Август аенда бавырсак пешерү буенча воркшоп ясаган идек. Алга таба да мондый чаралар булыр дип уйлыйбыз”, - ди ул.
Мастер-класстан соң Истанбулда татарча диктант язучыларга, Истанбулдан онлайн диктантта катнашучыларга Бөтендөнья татар конгрессы исеменнән Рәхмәт хатлары тапшырылды, I, II, III урынга лаек булганнар, иң өлкән һәм иң яшь диктант язучылар билгеләп үтелгән.