Иртәгә Татарстанда республика күләмендә Агач утырту көне була
Көрәкләр һәм үсентеләрне акция буласы урында бирәләр.
(Казан, 4 октябрь, "Татар-информ"). Иртәгә, 5 октябрьдә, Татарстанның барлык районнарында Агач утырту көне үткәрелә. Бу хакта Татарстан Республикасы Урман хуҗалыгы министрлыгының рәсми сайтында хәбәр ителә.
Татарстан Урман хуҗалыгы министрлыгы карамагындагы учреждениеләр 1,5 миллион төп агач: гадәти нарат, Европа чыршысы, Себер карагае, вак яфраклы юкә, гадәти миләш үсентеләре һ.б. әзерләп куйган.
Акция Казан янындагы өч мәйданчыкта: Биектау районының Сосновка һәм Колсәет авыллары һәм Питрәч районы Иске Шигали торак пункты тирәсендә узачак. Агач утыртуга Татарстан Республикасы Экология һәм табигать ресурслары министрлыгы хезмәткәрләре дә кушылырга җыена.
Акция 10:00 сәгатьтә башлана. Көрәкләр һәм үсентеләр акция буласы урында өләшенәчәк.