Ирек Фәйзуллин Россия Төзелеш министрлыгы башлыгының беренче урынбасары булды
Тиешле боерыкны РФ Премьер-министры Михаил Мишустин имзалады.
(Казан, 23 гыйнвар, «Татар-информ»). ТР Төзелеш, архитектура һәм торак-коммуналь хуҗалык министры вазифаларын башкаручы Ирек Фәйзуллин Россия Төзелеш һәм ТКХ министрының беренче урынбасары булды.
Тиешле боерыкны РФ Премьер-министры Михаил Мишустин имзалады.
2018 елдан башлап Россиянең Төзелеш министрлыгын Владимир Якушев җитәкли. Хөкүмәт составын яңартканда, ул үз постын саклап кала.
Моңа кадәр РФ Президенты Владимир Путин Мәскәүнең элеккеге вице-мэрын һәм Татарстанның Төзелеш министрлыгының элеккеге башлыгы Марат Хөснуллинны Виталий Мутко урынына вице-премьер итеп билгеләде.
Ирек Әнвәр улы Фәйзуллин 1962 елда Казанда туган, 1985 елда «сәнәгать һәм гражданлык төзелеше» белгечлеге буенча Казан инженер-төзелеш институтын тәмамлаган.