Иранның Казандагы Генераль консуллыгының яңа бинасы ачылды
Бүген Иранның Казандагы Генераль консуллыгының яңа бинасы ачылды. Ул Седов урамындагы 22нче йортта урнашкан. Тантаналы чарада ТР Дәүләт Советы Рәисе Фәрит Мөхәммәтшин һәм Иран тышкы эшләр министры урынбасары Вахид Җәләлзадә катнашты.
«Бу – истәлекле вакыйга. 17 ел элек Иранның Казандагы Генераль консуллыгы оешкан иде. Татарстанга, Генераль консуллыкка бик күп кеше килә, шуңа күрә яңа бина ачу турындагы мәсьәлә алга килеп басты», - диде парламент башлыгы.
Мөхәммәтшин Россия, шул исәптән Татарстанның Иран белән хезмәттәшлеге күп кенә мәсьәләләр буенча уңышлы үсеш кичерүен билгеләп үтте. «Үзара мөнәсәбәтләрне шактый киңәйттек. Безне дин, икътисади элемтәләр, дөньядагы вакыйгаларга сәяси карашлар якынайта», - дип искәртте ул.
ТР Дәүләт Советы Рәисе Казанда узган БРИКС саммитында актив аралашкан дәүләт башлыкларының килештерелгән эше алдагы хезмәттәшлек өчен яңа нигез һәм мөмкинлекләр булдырачагына ышаныч белдерде.
«Хәерле сәгатьтә. Биредә эш кайнап торсын», - дип белдерде Мөхәммәтшин.