Иран Президенты Масуд Пезешкиан Казанга килде
Скопировать ссылку
Иран Президенты Масуд Пезешкиан БРИКС саммитында катнашу өчен Казанга килде. Саммит 22 октябрьдән 24 октябрьгә кадәр дәвам итәчәк.
Мәртәбәле кунакны Татарстан Республикасы башкаласы халыкара аэропортында Татарстан премьер-министры Алексей Песошин, Казан мэры Илсур Метшин һәм Татарстанның Дәүләт Советы рәисе урынбасары Марат Әхмәтов каршы алды. Аэропортта Масуд Пезешкианга чәкчәк һәм икмәк белән тоз тәкъдим иттеләр.
- БРИКС берләшмәсенә 2006 елда нигез салына. Анда Бразилия, Россия, Һиндстан, Кытай, Көньяк Африка, Гарәп Әмирлекләре, Иран, Мисыр һәм Эфиопия керә. 2024 елда БРИКСта рәислек итү хокукы Россиягә күчте. Казанда узучы БРИКС саммиты – берләшмәдә катнашучы илләр башлыкларының 16нчы очрашуы. Саммитта оешманың барлык әгъзаларының мәнфәгатьләренә туры килә торган бик күп икътисади мәсьәләләр буенча фикер алышу планлаштырыла.
- БРИКСның 16нчы саммиты Казанда 22- 24 октябрьдә була. Анда 33 дәүләт вәкиле катнашуын раслады. Владимир Путин аның кысаларында 15тән артык ике яклы очрашу үткәрергә җыена. Татарстан Рәисе Рөстәм Миңнеханов билгеләп үткәнчә, мондый дәрәҗәдәге вакыйганы үткәрү – республика өчен зур мәртәбә һәм җаваплылык. Республика башкаласы мэры Илсур Метшин ул көннәрдә шәһәрнең 20 меңгә якын кунакны кабул итәчәген әйтте.