Ирада Әюпова: Татарстан Мәскәүнең мәдәни проектларын кабул итәргә әзер
Татарстан республикадан чыккан авторларның барлык мәдәни проектларына мәйданчык бирергә әзер. Бигрәк тә эшчәнлеге татар мәдәнияте белән бәйле булган осталар өчен. Бу хакта ТР Мәдәният министрлыгы җитәкчесе Ирада Әюпова Татарстанның Россиядәге Тулы вәкаләтле вәкиллеге каршындагы мәдәният һәм сәнгать эшлеклеләре клубы әгъзаларының еллык очрашуында белдерде.
«Безнең республикада сезнең теләсә нинди форматтагы чаралар өчен барлык мәйданчыкларны тәкъдим итәргә әзер - концерт программаларыннан башлап, сәнгать күргәзмәләре уздыруга кадәр. Барлык мәдәни проектларга яшел ут бирергә әзер. Эшчәнлеге безнең татар мәдәнияте белән бәйле булган осталар өчен өстенлекле тәртиптә», - дип мөрәҗәгать итте ул катнашучыларга.
Ул Татарстанның Мәскәүдәге вәкиллеге катнашында Мәскәү клубы әгъзалары белән уртак музыкаль-иҗади проект әзерләргә һәм Казан белән Татарстанның зур шәһәрләренә «мәдәни десант» җибәрергә тәкъдим итте.
Әюпова республика Рәисенең мәдәнияткә зур игътибар бирүен әйтте.
«14 декабрьдә безнең Татарстан Рәисе Рөстәм Миңнеханов каршындагы советның сәнгать мәсьәләләре буенча утырышы булачак. Без бүген яшьләрне мәдәни-әхлакый тәрбияләү мәсьәләләрендә медиаресурсларга оттырабыз. Яшьләр тышкы авторитетларга ачык, ләкин үзенең якын даирәсендәге киңәшләргә ябык диярлек. Әгәр сезнең иҗади очрашуларыгызны медиа кешеләре буларак яшьләр белән ышанычлы сөйләшү белән берләштерсәк, бу остазлык аларга мөһим хакыйкатьне җиткерергә ярдәм итәчәк», - диде ул.
Татарстанның Мәскәүдәге Тулы вәкаләтле вәкиле Равил Әхмәтшин билгеләп үткәнчә, 2024 елның августында Мәскәүдә Татарстан Рәисе Рөстәм Миңнеханов кушуы буенча традицион Татар мәдәнияте көннәре узачак.