Җиңү бәйрәменә Чаллы шәһәрен бизәү өчен әзерлек бара
Чаллы патриотик бердәмлекне чагылдыручы үзәккә әверелергә тиеш. Бу хакта башкарма комитет җитәкчесе урынбасары Винер Харисов белдерде. «Шәһри Чаллы» шул хакта яза.
Бөек Ватан сугышында Җиңүнең 80 еллыгы Чаллыда зурлап билгеләп үтеләчәк. Һәр ветеранга ТР Рәисе Рөстәм Миңнеханов исеменнән котлау открыткасы һәм азык-төлек пакетлары тапшырыла. Махсус хәрби операциядә катнашучы ир-егетләр дә игътибар үзәгендә була. Шәһәр мэры Наил Мәһдиев исеменнән 2500дән артык гаиләгә бүләкләр биреләчәк.
«Җиңү бәйрәменә шәһәрне бизәячәкбез. Чаллы патриотик бердәмлекне чагылдыручы үзәккә әверелергә тиеш. Шәһәрне бизәү буенча эскизлар әзер. Баннерлар урнаштырыла. Гыйнвар аеннан медиаэкраннарга махсус хәрби операциядә һәм Бөек Ватан сугышында катнашучыларның фотопортретлары урнаштырылды. Җиңүнең 80 еллыгы символикасы белән кибет, офислар, җәмәгать транспорты бизәләчәк», – диде башкарма комитет җитәкчесе урынбасары Винер Харисов.
«Хәтер бакчасы» акциясе кысаларында 500гә якын агач утырту планлаштырыла.